Саха Республикатын суруйааччыларын, Саха Республикатын суруналыыстарын сойуустарын чилиэнэ, суруналыыс, поэт, Үөдүгэй нэһилиэгин аҕа баһылыга, ытыктыыр доҕорбут
Валерий Васильевич Васильев – Муттуххай Бороҥ биһиги ортобутугар суох, күлэн-үөрэн киирбэт…
Өрүү сырдык санаалаах, хаһан да санаатын түһэрбэт үтүө-мааны майгыта уонна дьээбэни этээри мүчүҥнүүр халыҥ хаастаах мөссүөнэ өлбөт-сүппэт үтүө өйдөбүл буолуоҕа…
Олорбут дьоһун олоҕун оҕолоро, сиэннэрэ салгыыллар, суруйан хаалларбыт айымньылара, хоһоонноро ааҕааччы кутун туталлар, биһиги саныырбыт – ахтарбыт тухары күндү доҕорбут сүрэхпитигэр, санаабытыгар мэлдьи баар, тыыннаах…

Олоҕу анаарыы

Муттуххай Бороҥ

Төннөрбүн билбэккэ эрээри,
Ыйааҕым ыйыллан бу сиргэ
Алгыстаах аартыгым арыллан
Айыллан төрөөбүт эбиппин.

Билэбин бу сиргэ букатын
Барбаттыы кэлбит диэн суох,
Оннооҕор суор муҥур үйэтэ
Кыттыспыт да иһин бэрт кылгас.

Хайдах да муҥнаммыт иннигэр
Олоҕу бытаардар кыаллыбат,
Тохтоло суох күннэргин аахтара
Күн тахсыа, ыйы тыгыа солбуһа.

Хата мин кырдьаҕас ынахпар
Олуһун ымсыыра санаатым,
Бу дуолга, бу күөххэ буоллаҕа
Кыһалҕа кырата киниэхэ.

Арай мин олоҕу анааран
Кэхтибэт кэрэни сэҥээрэн,
Кэлэр кэм кэскилин кэтэһэн
Сэргэбэр өйөнөн турдаҕым.

Хотоҕос быатыныы субуллан
Хонуктар элэҥнээн ааһаллар,
Тиэргэммэр от үүнүө, ыт үрүө
Күөнэхтээх күөлүгэр собо ыа.

2013 с.