О.Д. Федорова аатынан киин модельнай библиотекаҕа олунньу 11 күнүгэр «КЭРЭХСЭБИЛЛЭЭХ КӨРСҮҺҮҮ» бырайыак чэрчитинэн санаа түмэр дьоро тэрээһин ыытылынна. Бу күн библиотекабыт сырдык саалатыгар улууспут киэн туттар, дьоһун киһитин – Георгий Алексеевич Степановы – ытыктабыллаах ыалдьыт быһыытынан ыҥыран, дьиҥ cылаас кэпсэтии буолла.
Георгий Алексеевич Степанов – Саха Өрөспүүбүлүкэтин норуотун хаһаайыстыбатын үтүөлээх үлэһитэ, Саха Өрөспүүбүлүкэтин бочуоттаах ветерана, Үөһээ Бүлүү улууһун, Үөһээ Бүлүү уонна Мэйик нэһилиэктэрин бочуоттаах гражданина, «Партийная доблесть» орден кавалера. Кини дьоһун олоҕун суола, ситиһиилээх үлэтэ-хамнаһа, дьоһуннаах дьоҕура, ыччакка бэриллибит туйгун холобур буолар.
Бу кэрэхсэбиллээх көрсүһүүгэ Георгий Алексеевич үөлээннээхтэрэ, бииргэ үлэлээбит коллегалара, комсомолецтара, чугас аймах-билэ дьоно-сэргэтэ тоҕо анньан кэлэн, ытыктабыллаах ыалдьыппытын уруйдаатылар-айхаллаатылар.
Георгий Алексеевич бэйэтин оҕо сааһын, эрчимнээх эдэр кэмнэрин, үөрэммит сылларын, армия кэккэтигэр сулууспалаабыт кэмнэрин уонна олоххо-үлэҕэ көрсүбүт интэриэһинэй түгэннэрин сэргэхтик-истиҥник кэпсээтэ. Тапталлаах кэргэнин, Валентина Николаевнаны, кытта көрсүбүт кэрэ түгэннэрин, ыал буолан оҕо-уруу тэнитэн, маанылаах дьиэ кэргэн буолбуттарын үөрэ-көтө кэпсээн мустубут дьон дууһаларын таарыйда.
Хабаровскай куоракка үрдүк Партийнай оскуолаҕа үөрэммитин, устудьуон олоҕун кэрэхсэбиллээхтик ахтан ааста. Олоҕор көрсүбүт араас моһоллорун, ол эрэн хаһан да бэриммэккэ иннин диэки дьулуспутун туһунан сэһэргээн, мустубут дьону барыларын умсугутта.Кини кэпсээнин истэн, мустубут дьон сэҥээриэхтэрин сэҥээрдилэр, санаалыын сырдаатылар.
Биһиги, библиотека үлэһиттэрэ, доҕорбутугар, Георгий Алексеевичка, ыҥырыыбытын ылынан, «Кэрэхсэбиллээх көрсүһүү» бырайыакка дьоһун ыалдьыт буолбуккар улахан махталбытын тиэрдэбит!
Георгий Алексеевич олоххо дьулуура, өйө-санаата биһиэхэ барыбытыгар сырдык суол буолар.
