От ыйын 3 күнүгэр Күөх Кэбээйи улууһугар Уһун Хонуу туонатыгар XIX өрөспүүбүлүкэтээҕи Олоҥхо ыһыаҕар Олоҥхо ааҕыытын түһүлгэтин арыйыы сиэрэ – туома ыытылынна.
Манна ыҥырыылаах ыалдьыттар, олоҥхоһуттар, элбэх эдэр ыччат тоҕуоруһа муһунна.
СӨ Бырабыыталыстыбытын бэрэссэдээтэлин солбуйааччыта С.В. Местников, СӨ Култуураҕа уонна Духуобунай сайдыыга миниистирэ А.И. Ноев кыттыыны ыллылар. Олоҥхо түһүлгэтин кэнниттэн
6 улуус үбүлүөйдээх олоҥхоһуттарын Бурнашов Н. П. – Боодоҕос (Уус Алдан), Терютина П. М. – Ырыа Ымыычаан (Чурапчы), Каратаев В. О. – Харатай Баһылай (Бүлүү), Ядрихинскай П. П. – Бэдьээлэ (Нам ), Титаров А. Т. ( Үөһээ Бүлүү), Николаев И. А.- Куоҕас Уйбаан (Кэбээйи) олохторун уонна олоҥхолорун улуустан кэлбит биир дойдулаахтара билиһиннэрдилэр.
Үөһээ Бүлүү биир биллэр олоҥхоһутун А.Т. Титаров туһунан Дүллүкү модельнай библиотекатын сэбиэдиссэйэ Я. О. Борисова билиһиннэрдэ.
Титаров А. Т. олоҕун, үлэлээбит үлэтин көрдөрөр быыстапка турда. Бу быыстапкаҕа Хомустаах нэһилиэгин кыраайы үөрэтээччитэ Г. Н. Васильева мунньубут матырыйаала быыстапка ис хоһоонун кэҥэттэ.
Түмүккэ Андрей Титаров эт куолаһынан олоҥхолообут олоҥхотун аудиозапистан иһитиннэрии көрөөччүлэр биһирэбиллэрин ылла.
