Бүгүн О.Д.Федорова аатынан киин модельнай библиотекаҕа өссө биир умнуллубат түгэн буолла. Үөһээ Бүлүүтээҕи «Сэргэх» түмсүү эбээлэрэ Бүтүн Арассыыйатааҕы «Читаем сказки народов мира» диэн интэриэһинэй аахсыйаҕа кытыннылар. Кинилэр оҕолорго остуоруйа алыптаах эйгэтин арыйдылар. Ол курдук, Василена Шарина, Марфа Шарина – Сырдыына суруйбут олус хорсун санаалаах Кустукчаана диэн кыыс мүччүргэнээх айанын туһунан «Алыптаах хомус» остуоруйаны ис сүрэхтэн ылынан аахтылар. Оҕолор Кустукчааналыын тэҥҥэ дьикти алыптаах хомуһу кытта билистилэр, үтүө санаатын күүһүнэн араас тургутуулары аастылар.
Оҕолор остуоруйаны олус сэргээн иһиттилэр, харахтара уоттанан, алыптаах дойдуга уйдаран, кэпсээн ис хоһоонун дууһаларыгар иҥэринэн олордулар. Эбээлэр оҕолорго остуоруйаны кэрэхсэбиллээхтик ааҕан остуоруйа алыптаах дойдутугар дьиҥнээхтик илдьэ бардылар. Эбээлэр ыраас, истиҥ саҥалара, кэпсээннэрэ оҕолор дууһаларыгар, өйдөрүгэр хатанан хаалла.
Бу тэрээһин оҕолорго остуоруйаны таптыырга, кини ис хоһоонун өйдүүргэ эрэ үөрэппэккэ, эбээлэр уонна оҕолор икки ардыларыгар истиҥ сыһыаны бөҕөргөттө.
