О.Д. Федорова аатынан киин модельнай библиотекаҕа атырдьах ыйын 14 күнүгэр дьоһуннаах тэрээһин буолан ааста. Саха Далбар Хотуна Зоя Егоровна Тумусова – САНААЙА «Саха дьахтарын санаата. Ыал. Итэҕэл. Төлкө» диэн саҥа кинигэтин билиһиннэрдэ.
Бу кинигэ аҕа көлүөнэ дьахтарын муудараһын, омукпут былыргы итэҕэлин дириҥ өйдөбүллэрин, ыал олоҕун уйулҕатын, кэргэнниилэр истиҥ сыһыаннарын уонна саха дьахтарын ис эйгэтин тула ыллыктаах санаалары түмэн, кэнчээри ыччакка тиэрдэр ураты суолталаах.
Кинигэ сүрэхтэниитин кэмигэр Зоя Егоровна тус олоҕор көрсүбүт түгэннэриттэн, алтыһан ааспыт дьонун-сэргэтин туһунан олус умсугутуулаахтык кэпсээтэ. Кини хас биирдии этиитэ, сүбэтэ-амата олоххо бэйэтэ туттуллан, чиҥник тургутуллан, дириҥ ис хоһооннонон истээччи сүрэҕэр тиийэр. Зоя Егоровна кинигэтэ эдэр ийэлэргэ олус туһалаах сүбэ-ама, өйөбүл буолуоҕа диэн бэлиэтээтэ.
Бу кинигэҕэ саха дьахтара киһи олоҕун тирэҕэ, ыал олоҕун тутааҕа буоларын, кэлэр көлүөнэни иитиигэ, үөрэтиигэ кини ытык иэһэ, төлкөтө киэҥник арыллар. Итэҕэл тирэҕэ, үгэс күүһэ, төрүт култуурабыт кэрэтэ – бу барыта кинигэ хас биирдии лииһигэр иҥэн сылдьар.
Ону сэргэ кинигэ атыытыттан киирбит үп барыта «Ытык сир» паарка тутуллуутугар көмө быһыытынан барара, Зоя Егоровна үтүө санаатын, омугун инники кэскилигэр кыһаллар дьиҥнээх патриот буоларын туоһулуур.
Тэрээһин биир кэрэ түгэнинэн Зоя Егоровна дьахтары омугун таҥаһа хайдах киэргэтэрин кэрэһилээбитэ буолла. Модельер-дизайнер Варвара Егорова – Дыгыйа дьүһүйбүт сахалыы таҥаһын көрдөрүүтэ, төрүт култуурабыт кэрэтин, уратытын өссө биирдэ арыйда.
Зоя Егоровна Дыгыйалыын билсэн, кини дьүһүйбүт таҥастарын сэҥээрэн, тус бэйэтигэр тикпит образтарын кэпсээтэ, көрдөрдө.
Зоя Егоровна Тумусова – Санаайа саҥа кинигэтэ саха норуотун олоҕор, култууратыгар, итэҕэлигэр дьоһуннаах кылаатынан буолуоҕа. Кинигэ ааҕааччыны кэрэҕэ, үтүөҕэ, дириҥ толкуйга ыҥырар, бэйэни уонна тулалыыр эйгэни саҥалыы көрөргө көҕүлүүр.
