Гольдеров Василий Федотович – Ороһу Уола тохсунньу 16 күнүгэр төрөөбүтэ 90 сыла

Саха биир талааннаах суруйааччыта, поэт, прозаик, ССРС суруйааччыларын Сойууһун чилиэнэ Гольдеров Василий Федотович – Ороһу Уола тохсунньу 16 күнүгэр төрөөбүтэ 90 сыла.
Василий Федотович 1932 сыллаахха Үөһээ Бүлүү оройуонун Ороһу нэһилиэгэр төрөөбүтэ.
Дьокуускайдааҕы педагогическай институту, кэлин Москватааҕы Максим Горькай аатынан литературнай институкка үрдүкү литературнай куурустары ситиһиилээхтик үөрэнэн бүтэрбитэ.
Гольдеров В.Ф. “Кыым”, “Уолуҥ саҥата” диэн бастакы кэпсээннэрин баара-суоҕа 23 саастааҕар суруйбута.
1959с. “Илгэлээх ардах” диэн бастакы кэпсээннэрин хомуурунньуга бэчээттэммитэ.
Бу тыа сирин кэрэ айылҕатын, үтүө үлэһит дьонун хоһуйар кэпсээн республиканскай куонкуруска 57 айымньыттан иккис бириэмийэҕэ тиксэн, эдэр поэт сүргэтин көтөхпүтэ. “Махтал” диэн хоһооннорун маҥнайгы хомуурунньуга 1968 сыллаахха тахсыбыта. 1970 сыллаахха “Доҕордоһуу чорооно” кинигэ күн сирин көрбүтэ. “Күһүөрү сайын”,”Көмүс күһүннүүн көрсүһүү”, “Билинии” о.д.а. кинигэлэрин саха ааҕааччылара үрдүктүк сыаналыыллар, кэрэхсииллэр. Василий Федотович үгүс айымньылара нуучча, башкир тылыгар талбаастаммыттара. Бэйэтэ Чингиз Айтматов “Тэбиэн хараҕа” диэн сэһэнин сахалыы тылбаастаан, дьонугар-сэргэтигэр сүдү бэлэҕи оҥорбута.

Василий Федотович “Эдэр коммунист”, “Кыым” хаһыаттарга, “Хотугу сулус” сурунаалга редакторынан, учууталынан, уус-уран литератураны пропагандалыыр Бюро директорынан, ССРС литературнай фондатын Саха АССР-га боломуочунайынан үрдүк таһаарыылаахтык, айамньылаахтык үлэлээбитэ.
Василий Федотович саха литературатыгар бэйэтэ туспа суоллаах-иистээх кэпсээнньит, философскай хабааннаах, сүгэ-балта тыллаах поэт быһыытынан ааҕааччы кутун туппута. Оттон “Умнуллубат онус кылаас” диэн хоһооно уостан түспэт ырыа буолан, көлүөнэттэн көлүөнэҕэ бэриллэн, кэнэҕэс кэлэр үйэлэргэ поэт аатын ааттатар пааматынньык буола туруо.
Василий Федотович тапталлаах кэргэнин Фаина Платоновнаны кытта Кыыс Амма кытылыгар олохсуйан, айан-тутан, олох олорон, оҕолорун атахтарыгар туруорбуттара. Кыыстара Саргылана Гольдерова – Саргы Куо – биллиилээх поэтесса, РСФСР суруйааччыларын Сойууһун чилиэнэ, уоллара Ньургун Васильевич – бөдөҥ тэрилтэ салайааччыта.
Гольдеров Василий Федотович төрөөбүт улууһун кытта ситимин быспакка, кэлэ – бара, билсэ – көрсө, кэлэр кэскили түстэһэ сылдьыбыта.