Үрүҥ күн көмүстээх чаҕылын,
Күөрэгэй көрүлүү дайарын,
Маҥнайгы ньургуһун тылларын
Таптаатым, эйигин таптаатым,
Хотугу халлааным кустугун,
Дьүкээбил үҥкүүһүт төлөнүн,
Өлүөнэм мөһүүрэ долгунун
Таптыырбар тэҥнээммин таптаатым
Таптаатым, эйигин таптаатым,
Айар дьол өрөгөй үөрүүтүн,
Үрүҥ күн анныгар хаамарбын,
Сарсыарда салгыҥҥа тыынарбын.
Үөр
Үрүҥ күн, бүтэй түүнү
Үнтү тэбэн кэбиһээт,
Өрө көтөн тахсыыта.
Үөр
Күргүөм чаҕыл күнүс
Күөх далбар сыһыыларга
Күөлэһийэ оонньуута.
Үөр
Ньургуһун төбөтүн нуоҕатар,
Долгуну окко утутар
Нуһараҥ чуумпу киэһэлэргэ.
Үөр кыраттан,
Үөр улахантан,
Үөр тыыннаах сылдьаргыттан,
Үөр көҥүл тыынаргыттан,
Үөр өлүөр буоларгыттан,
Үөр дьоннуун хаамсаргыттан…
Үөр үлэттэн,
Үөр эйэттэн,
Үөр туох баар
Бары үчүгэйтэн!
Үөр, оччоҕо өлүү
Өлөрдүү куттаныа эйигиттэн!
Өбүгэ үгэһэ ыҥыран
Сүрэҕим тыатыгар тардыста,
Бөлүүҥҥү кыраһа хаарынан
Төһө эрэ кырынаас сырыста!
Солоҥдо уот охтуу субуҥнаан
Дүлүҥтэн дүлүҥҥэ түстэҕэ,
Мукучай алааһы кытыылаан
Синньигэс сиигинэн тиктэҕэ.
Хараҕа лаахтана харааран,
Табысхаан чөкөллөн сыттаҕа,
Бараммат сыап оһуор субуйан
Ыалыкы ыарҕаны аахтаҕа.
Дуул лөкөй чоҥкутун хайытан
Силиитин наҕыллык хастарбын,
Кырыалаах арҕахха чугаһаан,
Бүө быстан тиритэ турдарбын…
Үлэҕэ, үөрэххэ даҕаны
Үүт көрдүүр оҕолуу батыһан,
Өбүгэ үчүгэй үгэһэ
Араҕан биэрбэтэ алыһын!
Уонна хаһан оҥороору,
Син иккистээн кэлбэккин,
Кэлин кэлэн ситэрбэккин,
Бу дойдуга эргийбэккин,
Этиһэн да тиллибэккин.
Уонна хаһан олороору,
Уонна хаһан толороору,
Үтүөнү саныы саныы
Үөтэлээҕи оҥорбоккун,
Ыра гынан ыллыы ыллыы
Ылсыһарга соруммаккын.
Саҕаламмат хойгур баҕа
Самыыра суох былыт тыала
Ылсыллыбат дойҕох санаа
Ынах тэпсэр суолун быыла
Бүгүҥҥү күн эргиллибэт
Быйылгы дьыл төннүбэт.
Күнүн аайы уһаппакка
Күнү-дьылы бараабакка
Оҥоруоҕу оҥоруохха
Толоруоҕу толоруохха
Уонна манна төннүбэккин
Этиһэн да тиллибэккин
Уонна хаһан олороору
Уонна хаһан оҥороору
Уонна хаһан?
