“Дьоммор иккис сурук“

Сыл, хонук аастар-ааһар,

Сырыы-үлэ уларыйар,

Урукку умнуллан барар,

Ураты аан аһыллар.

«Ырыа, үҥкүү сиэбит» уола

Ылдьаабыт — ыал аҕата,

Хараҥаччы быһый Маша —

Хаһаламмыт хаһаайка!

Иллэрээ күн эдэр аҕа

Эһэтээ буолбут бүгүн!

Бэрт чэгнэнник сылдьар Марфа

Пенсияҕа барбыт күһүн!

Тобукпар сүүһүм тиийэ

Тоҥхоччу кырдьар күммэр,

Бытыгым былас үүнэ

Быһа үктүүр түгэммэр,

Өссө тугу көрөбүнүй?

Өссө туохха тиийэрбиний?!

Билиэ суохпун эһигини —

Билигин баап көлүөнэни!

Ол кэмҥэ Үөһээ Бүлүү

Отой атын буолууһу,

Этээс үөһэ этээс үрдүү

Элбэх дьиэ тургуутууһу!

Ол кэмҥэ буор уулусса

Асфалынан кутуллууһу,

Онно мин сиэн кырасаабыссам

Туфельката тоһургууһу!

Онно Намныыр, Кэнтиктиир

Айан суола аатырыыһы,

Кырыымпа кылыгар тэҥнии

Кылбачыйа тардыллыыһы!

Оччоҕуна ардах күн

Самолету күүппэккин,

Өрүс уҥуор күнүс-түүн

Массыынанан сүүрдэҕин.

Оччоҕуна үүммүт от

Биир салаата да хаалбат,

Уоппускалаах эдэр дьон

Булт туһунан санаабат.

Алаас аайы ынах суөһү

Айаатаһар айдаана,

Толооннорго сылгы үөрүн

Хаары ыһар бурхаана!

Маҕаһыыҥҥа эт бөҕө!

Эмээхситтэр сирэллэр;

Барыта сыа да хаһа!

Мииннээх эти биэрбэттэр!

Арыыны да сүөгэйи

Бүгүҥҥүтүн ылаллар,

Бээһээҥҥини — эргэрбити

Үҥсэ барыах буолаллар.

Оттон субу соболор

Олорор оҕо саҕалар,

Эчи, наһаа улахаттар,

Искэхтэрэ мастыйбыттар …

Хата, хатыыс баар эбит,

Хатыыста, чэ, ылыахха,

Тыаттан дьоҥҥо тонсукка

Туруордахха син ини!

Хаппыыстаны, оҕурсууну

Хайа муҥун таһаллар?!

Ананаһы, бананы

Арыт ТОБО таһаарбаттар?!

Оо, килиэппит бүгүн эмиэ

Уонча эрэ араастаах,

Кини баҕас элбээбэтэ,

Кирдигэ, дуол кыһыылаах!

Өтүүктэммэт таҥаһы

Өрүү-көтө таһаараллар,

Сууйуллубат ырбаахыны

Субу-субу аҕалбаттар!

Бриллиант биһилэхпит

Бэлиэр бүппүт дэһэллэр,

Вера, Галя кинииттэрбит

Биир ый быһа кэтэһэллэр…

…Оо, тоҥхоччу кырыйдарбын,

Ол күн манна буолларбын—

Ол дьыл кэрэ ыччаттарбын

Уруйунан тоһуйдарбын!

Москва к.