Ыам ыйын 5 күнүгэр, УЛУУ КЫАЙЫЫ 78 сылын көрсө, оччотооҕуга хас биирдиибит дьиэ кэргэнин тумнубакка ааспыт кэмнэригэр, алаас аайыттан хомуллан  уоттаах сэриигэ ыҥырыллан барбыт буойуттарбытыгар туһаайыллар, “СЭРИИ- МИН ТӨРҮТТЭРИМ ДЬЫЛҔАТЫГАР…” тэрээһин ыытылынна.

Бу күн сэрии толоонуттан эргиллибэтэх уонна эйэлээх олоҕу олохтоспут сэрии бэтэрээннэрин сыдьааннара күндү дьоннорун ахтан-санаан аастылар:

• Гвардия младшай сержана, старшай разведчик, кыһыл сулус уордьаннаах Адамов Гаврил Данилович туһунан кыыһа Антонина Гаврильевна Хобусарова кэпсээтэ;
• Забойкальскай фроҥҥа сэриилэспит Федор Давыдович Гольдеров туһунан кыра кыыһа Гольдерова Ульяна Федоровна истиҥник сэһэргээтэ;
• Аҕа дойду улуу сэриитин үс улуу кыргыһыытын кыттыылааҕа Хоро нэһилиэгиттэн төрүттээх Василий Пудович Евдокимов бойобуой суолун сырдатта хос сиэнэ М.А. Алексеев аатынан Лицей интернат 5 кылааһын үөрэнээччитэ Күннэй Васильева;
• Буойун, самодеятельнай  композитор Георгий Максимович Никифоров, 1944 сыллаахха Советскай Армия кэккэтигэр ыҥырыллар. Онно 6 сыл сулууспалыыр уонна Японскай империалистары утары сэриигэ кыттан Харбин куоракка тиийэн хас да бойобуой медаллаах төннөр. Георгий Максимович туһунан ахтан – санаан ааста кыыһа Иванова Евдокия Георгиевна;

•  Саха АССР уонна РСФСР оскуолаларын үтүөлээх учуутала Дмитрий Спиридонович Спиридонов бойобуой суолун сырдатта – Дмитрий Спиридонович кыыһа Раиса Дмитриевна Спиридонова;
• Сургуулук нэһилиэгиттэн төрүттээх 1944 сыллаахха сэрии толоонугар охтубут Аталларов Иван Саввич (1923-1944)  бойобуой суолун кэпсээтэ Иван Саввич сыдьаана Игнатьев Гаврил Емельянович, Үөһээ Бүлүүтээҕи техникум студена;

•  Бэйэтин баҕатынан сэриигэ барбыт Аһыкай нэһилиэгиттэн төрүттээх Егоров Павел Петрович олоҕун санаан ааста Пантелеймон Прокопьевич Егоров;
• Бүлүү Үгүлээтиттэн төрүттээх Николай Иванович Константинов бойобуой суолун кэпсээтэ сиэнэ Үөһээ Бүлүүтээҕи техникум 1 курсун устудьуона Васильев Любомир Алексеевич;
• Үөһээ Бүлүүтээҕи комсомол, кэлин коммунистическай партия райкомун инструкторынан үлэлии сылдьан 1942 сыллаахха, сэриигэ барбат бронялаах эрээри, төрөөбүт дойдутун немецкай халабырдьыттартан көмүскүү, тылланан барбыт, сэрии толоонугар сураҕа суох сүппүт Гаврил Васильевич Лазарев туһунан ахтыы оҥордулар сиэнэ Лазарев Гаврил Григорьевич  кэргэнэ Лазарева Ирина Иннокентьевна уонна Гаврил Васильевич олоҕун чинчийбит кыраайы үөрэтээччи Нина Родионовна Саввинова;
• Үөдүгэй нэһилиэгин олохтооҕо,  кадровай булчут, III Украинский фроҥҥа сэриилэспит, Вена куораты ылааһыҥҥа мэдээллээх, Алексей Наумович Чоросов туһунан кэпсээтэ хос сиэнэ Тарасова Вероника Егоровна;
• Сахалартан бастакынан история билимин кандидатын көмүскээн баран Ленинград куорат көмүскэлигэр охтубут буойун, учуонай Нам нэһилиэгиттэн төрүттээх Никон Семенович Романов туһунан сырдаттылар Нам библиотекатын сэбиэдиссэйэ Уруйдаана Юрьевна Саввинова уонна учуонай балта Тыа хаһаайыстыбатын үлэтин бэтэрээнэ Надежда Михайловна Романова.

Кинилэр кичэйэн-харайан уура сылдьыбыт, күндү дьоннорун сэдэх хаартыскаларынан, бойобуой наҕараадаларынан докумуоннарынан, малларынан оҥоһуллубут “Кыайыыны түстээбит кэриэс маллар… ” диэн  киэҥ хабааннаах быыстапка дьон-сэргэ болҕомтотун  тарта, эдэр ыччат сэҥээрэн сөҕө көрдө, киэн тутунна. Ордук чуолаан буойуттар буорах сыттаах суруктарын, кинилэр бэлиэтэммит күннүктэрин илиилэригэр тутан долгуйа аахтылар.

Биһиги билиҥҥи көлүөнэ дьон сэрии аһыытын – абатын, кутурҕанын илэ харахпытынан көрбөтөхпүт, эппитинэн – хааммытынан билбэтэхпит, дьэ ол иһин сүрэхпит тугу этэринэн, олоххо кинилэргэ кыайан төлөммөт иэспит туһугар биһиги оҕолорбутугар, сиэннэрбитигэр Аҕа дойдуга тапталы, Аҕа дойду көмүскэлигэр барбыт, тыылга хаалан үлэлээбиттэргэ дириҥ ытыктабылы, убаастабылы кинилэр эдэркээн сүрэхтэригэр, өйдөрүгэр – санааларыгар тиэрдэр, иҥэрэр биһиги ытык иэспит!