Сэтинньи 30 күнүгэр Үөһээ Бүлүүтээҕи киин библиотекаҕа «Удьуор утумун үтүө холобура» электроннай кинигэ презентацията ыытылынна.
Саха АССР Верховнай Советын депутата, президиумун секретара Саха АССР Совнаркомун председателин солбуйааччыта, САССР норуотун хаһаайыстыбатын үтүөлээх үлэһитэ, «Бочуот знага» уордьан кавалера ПАВЕЛ ИВАНОВИЧ КОРЯКИН төрөөбүтэ 110 сылыгар, кинини үйэтитэр, биир дойдулаахтарыгар билиһиннэрэр сыаллаах электроннай кинигэ оҥоһулунна. Хомуйан оҥордулар СӨ норуотун хаһаайыстыбатын үтүөлээх үлэһитэ Н.Ф. Гурьева, Үөһээ Бүлүүтээҕи киин библиотека үлэһиттэрэ Г.А. Егорова, Е.П. Долгаева. Электроннай көрүҥүнэн АА. Золотарев таҥан оҥорон таһаарда.
Электроннай кинигэни https://e.vvlibr.ru/ Үөһээ Бүлүүтээҕи библиотека ситимин электроннай библиотека сайтыгар ааҕыхха. Бу күннээҕи көрсүһүүгэ анаан олохтоох типография кинигэни кумааҕыга бэчээттээн таһаарда.
Кинигэҕэ Павел Иванович дакылааттара, хаартыскалара, кини туһунан ахтыылар таҥыллан киирдилэр. Корякин П.И. «О брошюре тт. Канаева, Ефремова и Тихонова» диэн
ыстатыйата ааҕааччы интэриэһин тардаллар. Бу докумуону историческай наука доктора Никита Деевич Архипов архыыптан булан Үөһээ Бүлүү улууһун туһунан кинигэҕэ аан бастаан киллэрбитэ. Бу докумуоҥҥа 50-с сылларга саха норуотун бастакы суруйааччылара А.Е.Кулаковскай, А.И.Софронов, Н.Д. Неустроев айымньыларын тула мөккүөрдэр үөскээбиттэригэр, эдэр учуонайы Г.П. Башарины национализҥа буруйдаабыттарыгар хардаран, ол саҕана БСК(б)П Саха сиринээҕи обкуомун идеологияҕа сэкирэтээрэ П.И.Корякин быһаччы Г.П.Башарин кинигэтин ис хоһоонун көмүскээбитэ, онтон сылтаан үлэтиттэн ууратыллыбыта. Ол туһунан уонна кини олоҕун, үлэтин туһунан Н.Д.Архипов ахтыытыгар суруйар. Үөһээ Бүлүүлэртэн аан бастакынан өссө 1940 сыллаахха Союздетфильм «Романтики» уус-уран киинэтигэр артыыс быһыытынан уһуллубутун сэһэргээтилэр.
Киин куораттан быһа холбонон учуонайдар В.К. Марщинцев, З.М. Кузьмина Г.Н. Саввинов уонна Павел Иванович аймахтара кэпсэтиигэ кыттыһан, Боотулуу, Далыр нэһилиэктэрин баһылыктара, түмэл үлэһиттэрэ мустан бэрт сэргэх истиҥ тэрээһин буолла.
Түмүккэ судаарыстыбаннай, общественнай деятель Павел Иванович Корякин туһунан эбии үөрэтэн, докумуоннары, ахтыылары хомуйан дьоһуннаах кинигэни таһаарарга, төрөөбүт дойдутун оскуолатыгар бырааттыы Корякиннар ааттарын иҥэрэр туһунан этиилэр киирдилэр.
