Олунньу 28 күнүгэр О.Д. Федорова аатынан киин модельнай библиотека ааҕар саалатыгар Дьиэ кэргэн Сылын арыйар, Үөһээ Бүлүүбүт киэн туттар учууталлара, Саха АССР, РСФСР үтүөлээх учуутала Дмитрий Спиридонович Спиридонов уонна Саха АССР үтүөлээх учуутала, Герой ийэ Ксения Илларионовна Жиркова дьоһуннаах олохторун кэрэһэлиир, улахан дьоллоох дьиэ кэргэн уйгулаах олоҕун дьоҥҥо-сэргэҕэ тарҕатар “Свет немеркнущий” кинигэни Спиридоновтар төрөппүт оҕолоро таһаартардылар. Кинигэ проегын автора государственнай сулууспа ветерана, Спиридоновтар кыыстара Агния Дмитриевна Игнатьева буолар. Тэрээһиҥҥэ саала толору улууспут киэн туттар дьоно, Д.С. Спиридонов аатынан орто оскуола уонна Исидор Барахов аатынан оскуола коллективтара, улуус үөрэҕин управлениетын салалтата, Спиридоновтары билэр биир үөлээннээхтэрэ, үөрэппит оҕолоро, аймахтара, оҕолоро, сиэннэрэ мустан ахтан-санаан, үйэтитэн, сэһэргээн аастылар.
Бу кинигэни, дьиэ кэргэҥҥэ иитэр-үөрэтэр суолталаах, улуус үөрэҕин сырдатар историческай, архивнай сыаннастаах сүдү кинигэ буоларын бигэргэтэн эттилэр-тыыннылар, оҕолоругар махтаннылар. Кинигэ “Свет немеркнущий” 2023 с. “Учуутал уонна Уһуйааччы” Сылыгар “Дани- Алмас” бэчээттиир кыһатыгар сахалыы, нууччалыы тылынан, сэттэ түһүмэхтээх, элбэх историческай хаартыскалардаах, халыҥ тастаах, 400 н тахса бэчээтинэй лиистээх кинигэ 100 ахсаанынан таҕыста. Кинигэ тас өттө аатыгар сөп түбэһэр, саһархай өҥҥө икки ытыс өрө ууммутугар күн чаҕылыччы тыкпытын өрө ууммут илиитэ саһарҕаҕа сандаарыйан көстөр. Ол күн тыкпыт сардаҥатыгар иллээх дьиэ-кэргэн Ийэлээх Аҕатын мэтириэттэрэ сэгэччи көрөн олороллоро көстөр. Дьоһуннаах кинигэни библиотекаттан ылан ааҕыҥ, кэтэһэбит.
