Бүтүн Арассыыйа үрдүнэн ыытыллар “Библионочь – 2024” “Дьиэ кэргэнинэн ааҕабыт” акция О.Д. Федорова аатынан улуустааҕы киин модельнай библиотекаҕа, Арассыыйаҕа Дьиэ кэргэн, Саха өрөспүүбүлүкэтигэр оҕо саас сылларыгар ананан элбэх киһи кыттыылаах бэрт сэргэхтик буолан ааста. Тэрээһин саҕаланыытыгар Н. Бойлохов аатынан Оҕо искусство оскуолатын “Сааскылаана” оҕо образцовай үҥкүү ансамблын кырачаан кыргыттара “Чуораанчыктар” үҥкүүлэрин бэлэхтээтилэр (сал. Уйгулаана Павлова).
Тэрээһини иилээн-саҕалаан ыыттылар “Аленушка” уһуйаан тэриллибитэ 35 сылыгар ыытыллыбыт “Дьиэ кэргэн -2024” күрэх кылаан уонна улуустааҕы Дьиэ кэргэн күрэҕин “Тыа сирин бастыҥ дьиэ кэргэнэ” анал аат кыайыылаахтара Ариан Степанович, Хотууна Семеновна Яковлевтар дьиэ кэргэттэрэ арыйдылар. Бу күн күндү бэлэх тутуурдаах Матрена Егоровна аҕатын Егор Егорович Тоноев туһунан кинигэни бэлэх уунна.
Кыттыыны ыллылар уонна бэйэлэрин эҕэрдэлэрин тиэртилэр Үөһээ Бүлүү баһылыгын социальнай хайысхаҕа уонна дьиэ кэргэн бэлиитикэтигэр солбуйааччы А.М. Уларова, культура уонна духуобунас департаменын салайааччыта А.М. Мойтохонова. О.Д. Федорова аатынан улуустааҕы киин модельнай библиотека директора Н.К. Петрова кэлбит дьону эҕэрдэлээтэ уонна бу күнтэн сынньалаҥы, дуоһуйууну ылан баралларыгар баҕаран туран кинилэргэ ананан оҥоһуллубут кабинеттарга ыҥыртаата.
Кабинеттарга нэһилиэнньэҕэ анаммыт араас көрүҥ быыстапкалар, фотозоналар ону кытта дьиэ кэргэнинэн көрсүһүү, квиз-оонньуу, улуустааҕы коллекционердар түмсүүлэрин мунньуу маллара, дьэрэкээн сыттаах эмтээх оттор, чэй, инникини тымтыктанан көрүү, бэйэ мэтириэтин уруһуйдатыы, улуустааҕы маастардар түмсүүлэрин уран тарбахтаахтарын маастар-кылаастара ыытылыннылар. Уонна араас киһини умсугутар атыылар-кутуулар, атах тэпсэн олорон кэпсэтиилэр. Доруобуйа муннуга, оҕолорго араас остуоруйалар кэпсэннилэр, кинигэлэр көрдөрүлүннүлэр.
“Кинигэ доҕордоох дьиэ кэргэн аҕа баһылыга” төгүрүк остуолга кыттыыны ыллылар урукку сыллартан библиотека бастыҥ ааҕааччылара Золотарев Г.И., Иванов А.И., Павлов Н.Е., Буртахов О.Н. Кинилэр кинигэни ааҕыы киһи олоҕор сүҥкэн суолталааҕын, кинигэ ааҕыыта киһи билиитин таһымын үрдэтэрин туһунан бэйэлэрин холобурдарыттан эдэр ыччакка кэпсээтилэр.
“Дойду дьонноох, киһи суоллаах” сэттэ түһүмэхтэн турар квиз оонньуу ыытылынна. Манна дьиэ кэргэнинэн 1 миэстэни – Федот, Елена, оҕолоро Сахамин Николаевтар, 2 миэстэни – Александр, Альбина, кыыстара Ай Куо Ивановтар, 3 миэстэни – Федор, Анастасия уоллара Данил Даниловтар ыллылар. Надежда, Мичил, кыыстара Таня Егоровтар уонна Хотууна, Ариан, уоллара Маркель Яковлевтар биһирэбил бириистэринэн наҕараадаланнылар.
Бүтэһиккэ дылы сылдьан араас күрэхтэргэ, маастар кылаастарга кыттыбыт Федот, Елена Николаевтар дьиэ кэргэттэригэр “Карина” киинэ биэс билиэтинэн оттон Хотуна, Ариан Яковлевтар “Уютный дом” (сал. О.С. Николаева) маҕаһыынтан икки тыһыынча суумалаах сертификатынан наҕараадаланнылар. Кыра саастаах оҕолорго “Эбээм аптаах холбуката” остуоруйа кэпсээн үгүс үөрүүнү бэлэхтээбит күндү култуурабыт бэтэрээнэ Алла Семеновна Григорьева киин модельнай библиотека аатыттан сэмэй бэлэх туттарылынна.
Быйылгы Дьиэ кэргэттэргэ анаммыт “Библионочь 2024” акциябыт олус интириэһинэйдик, истиҥник ааһан, бары дуоһуйа сынньанан, хаартыскаҕа түһэн, билиилэригэр билии ылынан, сатабылларыгар элбэх сатабыл иҥэринэн илии тутуурдаах бардылар. “Библионочь- 2024” акцияҕа барыта 216 киһи сырытта, ол иһигэр элбэх оҕо, ыччат сырыттылар.
Уон үһүс төгүлүн ыытыллыбыт “Библионочь – 2024” тэрээһиҥҥэ кыттыбыт ыччат уонна дьиэ кэргэн политикатын салайааччытыгар А.А. Кардашевскаяҕа, С.С. Мироноваҕа, ыччат политикатын сүрүннүүр специалиһыгар, волонтердарбытыгар, ааҕааччыларбытыгар, көмөлөспүт урбаанньыттарбытыгар улуустааҕы киин библиотека аатыттан барҕа махталбытын биллэрэбит. Инникитин да ыытыллар тэрээһиммитигэр кэлэн кыттыыны ыларгытыгар баҕарабыт.
