1874-02.02.1960 гг.
Ыскаадар кыыһын уола Ынта Никиитэ Үөһээ Бүлүү улууһун (Сыалыйа Намын) Дүллүкү нэһилиэгэр төрөөбүтэ. Эдэр сааһыгар Өлүөхүмэҕэ баайдарга батараактаан сылдьыбыт. Кыыллаах Арыы дьахтара кэргэннээх этэ. Уола Александров Илья Никитич 1941 с. сэриигэ баран сураҕа суох сүппүт.
Эдэриттэн олоҥхолуура, сэттэ түүннээх-күн кэпсээн-ыллаан биэрэрим диирэ. Олоҥхотун уһуна бэрт диэн наар быһа тардан толороро. Тыла-куолаһа ырааһынан хайҕанара.
Бодойбоҕо сылдьыбыт, 1912 с. ытыалааһыҥҥа баар эбит, кэлин Кыллаахха, Дьокуускайга олорбут. Кырдьан баран Үөһээ Бүлүүгэ, Бүлүүгэ олоҥхолуура. Былыргылыы дьуохары этэрэ, 1947 Кыайыы ыһыаҕар алгыс толорбут. Элбэх тойуктааҕа суруллубакка хаалбыт. «Күүстээх от аһылыктаах Күөкэримэ сүүрүк аттаах күн киһитин күүстээҕэ Көй Буурай бухатыыр» олоҥхону толороро. Кырдьан баран самодеятельноска кыттан абааһы уола Уот Уһутаакы ороуолун толороро.
(26.02.1977 с. Макар Егорович Федоров ахтыыта, Илья Евсеевич Давыдов хомуйуута).
Ахтыы
Мин бу ахтыыны оҥорооччу олоҥхоһут Александров Н.С. убайын уолабын. Никиитэ эһэтэ Ыскаадар Сэмэн, мин эһэм Сүөдэр бырааттыы эбиттэр. Биһиги аҕа ууһугар кини эрэ олоҥхоһутунан аатырбыт.
Сэттээх тыллаах диэннэр, мин аймахтарым улаханнык сэргээбэт этилэр. Дьиэтигэр хаһан да олоҥхолообот, ыллаабат үгэстээҕэ. Саҥарар саҥата мэлдьи уус-истэн олоруох курдуга. Бэйэтэ кэпсииринэн тылыттан-өһүттэн ойууттар чаҕыйаллара үһү, манньа биэрэ-биэрэ ап хомуһун тылына этэн кулу диэн көрдөһөллөрө диирэ. Алыс ыллаан, ордук туойан, иннибэр-кэннибэр кэнчээри ыччата суох өллүм диэн улаханнык кэмсинэрэ. Оҕомсох буолара, кыраттан үөрүнньэҥ, дуона суохтан хоргутумтуо этэ.
Сэрии иннинэ «Күүстээх от аһылыктаах Күөкэримэ сүүрүк аттаах, күн киһитин күүстээҕэ Көр Бурай бухатыыр» диэн олоҥхотун суруттаран испит. Суруйбуи киһи Тобуков Евгений Захарович Аҕа дойду сэриитигэр баран өлбүт.
«Хотугу сулуска» (сурунаал) 1957-1958 сылларга баар тойугу Васильев Егор Васильевич диэн учууталынан суруйтарбыт сураҕа биллэр.
Кырдьан бүтэн олорон, ырыа-тойук сэҥээриллибэт кэмигэр төрөөн суола-ииһэ суох сүттүм диэн хомойор этэ. Абааһыны да, таҥараны да итэҕэйбэт этэ. «Тиистээҕим-уостааҕым буоллар, ама аныгы ырыаһыттар курдук ыллаатамый», диэн араадьыйанан истэрин соччо сөбүлээбэт буолара. Александров Никита Семенович олунньу 2 к. 1960 с. өлбүтэ.
1977, олунньу 26 к.
